Clarisonic VS Foreo Luna

Saturday, January 21, 2017
مقارنة بين جهاز كلارسونك و فوريو لونا
اهلين بنات
كثير منكم يتساءلون ايش افضل للاستخدام الكلارسونك او فوريو لونا
حبيت اكتب لكم هذي التدوينة لان من فتره لما وصلني جهاز الفوريو وعدتكم اني بعد استخدامه لفتره طويله بسوي مقارنه بينه وبين الكلارسونك


بتكلم أول شي عن الكلارسونك
هو جهاز لتنظيف الوجه .. بشكل عميق جدا
لدرجة انك حتى لو نظفتي وجهك زين بعد الميك اب و استخدمتي الكلارسونك بتلاحظين  فيه بقايا ميك اب ..
اللي عندي نوعه بلس ,, وهذا النوع تجي معاه فرشه للجسم و فرشتين للوجه
حبيت اخذه عشان ابغى تنظيف للجسم و سعره كان ممتاز تقريبا 700 ريال , اخذته من سنتين بتخفيضات موقع نوردستروم ( موجود عندنا في سيفورا )
و يستاهل كل ريال فيه ..
وعندي النوع الثاني الجديد (ميا فيت) .. حجمه صغير يناسب للتنقلات .. و سعره تقريبا 870 ريال
ميزته ان شحنه يطوّل مررره .. بس ما يناسب لتنظيف الجسم لان حجمه صغير
طريقتي :
أبلل وجهي و الفرشة بالمويه و احط الغسول عليها .. و أبدأ امرر الفرشة بس بلطف مررره
 الحلو بالجهاز ان فيه مثل التنبيه عشان تنتقلين من جهة لجهة .. لأن الذبذبات مقسمه على أجزاء الوجه.. 20 ثانيه للجبهه و 20 ثانيه للانف و الدقن و 10 ثواني للخد اليسار و 10 ثواني للخد اليمين
في بداية استخدامه بتلاحظين تطلع لك حبوب  وهالشي طبيعي .. و الافضل ما تستخدمينه بشكل يومي ..
بالنسبة لي استخدمه إذا ارهقت بشرتي بالميك اب يوميا .. لان مستحيل انام و فيه بقايا ميك اب بوجهي ..
و استخدمه قبل الميك اب عشان أضمن ان بشرتي نظيفه ويشيل القشور منها ويكون الفاونديشن صافي و نظيف
 الجهاز يجي معاه ستاند للشحن .. و ينشحن ل 6 استخدامات تقريبا و اذا خلص شحنه لازم ينشحن وقت طويل و يمتد الى ثاني يوم تقريبا (وهذا من عيوبه)
و أهم نقطه لازم تعرفينها إن الفرشاة لازم تتغير تقريبا كل 3 شهور و سعر الفرشة بحدود 120 ريال
انا بصراحه ما اغيرها كل 3 شهور بس لازم بعد الاستخدام اغسلها زين و اعقمها ,
و فرشة الجسم ما غيرتها الى الان لاني نادرا استخدمها
 
أنصح فيه بشددده و ضروري يكون عند كل بنت .. و اللي استخدمته بتعرف ان كلامي صح

فوريو لونا
منها أنواع كثيره و حسب نوع بشرتك تاخذين الفرشة المناسبة لها
اللي عندي اللون الازرق للبشرة الدهنية المختلطة
جهاز من جهتين وحده لتنظيف البشرة .. و كمان جهة ثانية يستخدم مع الكريمات اليومية ليزيد من إمتصاص البشرة لها و المحافظة على شبابها و إزالة خلايا الجلد الميته..
مكوّن من شعيرات سيليكونية تمنع تكون البكتيريا على الفرشاة .. لهذا السبب ما تحتاجين تغيرين الفرشة لانها اساسا ما تتغير
ميزته نااااعم جدا على البشرة
بالنسبة للتنظيف ما اعجبني ابد .. تنظيفه مو عميق ..
حبيته كثيييييير مع الكريمات .. و اعتمدته اكثر معاها أو اذا احتجت انظف وجهي يوميا .. و الكلارسونك للتنظيف العميق الاسبوعي
عيبه ان الشحن مايطول ابد و بعد استخدامين لازم تشحنينه .. (يجي معاه شاحن)
سعره بحدود 900 ريال و متوفر بصيدليات وايتس

و للإجابة عن تساؤلكم ..
بالنسبة لي أفضّل الكلارسونك للتنظيف
و الفوريو مع الكريمات او للتنظيف اليومي .. لان الكلارسونك قوي عالبشرة للاستخدام اليومي مثل ما قلت لكم

اللي إستخدمتهم تقولنا تجربتها معاهم عشان كلنا نستفيد ..

0 التعليقات:

Post a Comment

Top