منتجات خلصتها

 

مجموعة من منتجات العناية و التجميل اللي خلصتهم

 

 

كل بنت تفرح طبعا انها خلصت منتجات عشان تشتري غيرها :))

وانا طبعا احس بمتعه وفرحه اذا خلصتهم عشان احس اني حللت فلوسهم :)) و عشان أجرب منتجات غيرهم ..

في هذا البوست حطيت بعض من المنتجات اللي خلصتها و بوضحهم بشكل مفصل و ايش اللي رجعت اشتريته وايش اللي ماافكر اشتريه مره ثانيه ..
مو عشان ماعجبني .. بس عشان ابغى اجرب غيره فقط

اولا .. ماسك النيم من هيمالايا للوجه .. جميل و ناسبني كثير .. عيبه انه ينشف البشره تماما ومفيد فهو يزيل الاوساخ منها و يصفيها ..
حبيته بس مابرجع اشتريه لان عندي ماسكات كثير و احيانا اسوي ماسكات طبيعيه ..

شامبو نيزورال للقضاء على قشرة فروة الرأس .. نصحني فيه طبيب جلديه لان بفترات تطلع لي قشره .. جميل جدا و ناسبني وقبل يخلص اشتريت ثاني ..

صابون لوكس السائل للجسم .. ترطيبه عاااالي و ناسبني لان جسمي يجف تماما بعد الشاور .. فيه منه بكذا رائحه..

سبراي فازلين اخذته من امريكا وسمعت انهم وفروه هنا .. يبخ على كامل الجسم بعد الشاور اذا كان مبلول شوي .. يعطي ترطيب و نعومه
ماتحمست ارجع اشتريه لان اقدر ارطب جسمي بمنتجات ثانيه ..

برايمر للجفون من بينفيت stay dont stray .. جميييييييل جدددا ومن افضل برايمرات العيون اللي استخدمتها
يثبت الاي شادو فتره طويله و ممكن يستخدم ككونسيلر .. فيه منه درجتين ..

كريم فيتشي لتحت العين .. جميل و ناسبني بس لقيت افضل منه ( بكتب عنهم بوست قريب)

ريموفر لمكياج العيون من لوريال .. استخدمه من فتره طويله .. قوامه زيتي يناسب لإزالة المكياج اللي ضد المويه
لقيت افضل منه عند سيفورا و ماافكر ارجع اشتريه ..

تونر للوجه من نيفيا .. جدا جدا حبيته يزيل الاوساخ وينظف البشره و ابدا ماهو ثقيل ولايترك اثر .. ممكن اشتريه مره ثانيه اذا انتهى تونر يوسيرين اللي عندي ..

مرطب وجه من بايوديرما .. حبيته مرررره و ترطيبه جدا عالي .. ناسبني بس اكتفيت بسيروم الترطيب من كلارنس

فاونديشن ميبلين ايج ريوايند .. كثير جربوه وماناسبهم بس انا ناسبني كثيييير و حبيت الفينيش تبعه .. استخدم قبله برايمر تنت من لورا مرسيه .. عيبه انه مو متوفر بأسواقنا و جبته من امريكا .. و الافضل تضبطين درجتك فيه .

كريمات الجلسرين من جليسوليد .. وَعينا عالدنيا وهي موجوده ونستخدمها و كثر تقليدها .. لكن هي الافضل من ناحية الترطيب العاااالي
استخدمهم للقدمين لانها جافه جدا عندي

 

ومن الاشياء اللي خلصتها بعد .. سن سكرين من منتجات derma topix و موجوده بشركة عبر الطب و الصيدليات الكبيره

وهو خالي من الزيوت و مايدهن البشره ابددد و حمايته حلوه

ممكن ارجع اشتريه بس عيبه ان علبته كبيره وهو ينتهي ب 4 شهور

 

ماسكرا تارت الذهبيه . من اجمل الماسكرات اللي استخدمتهم و مرررره احبها بس للأسف الماركه مو موجوده عندنا

كونسيلر نارس nars radiant creamy من اجمل الكونسيلرات اللي عندي و اشتريت ثاني قبل يخلص :)) درجتي جينجر فما احتاج معاها كوركتر لان اللون على بيتش شوي

 

وبكذا انهيت الموضوع و اتمنى استفدتوا .. و اذا حابين اتكلم بالتفصيل عن أي منتج فيهم انا حاضره ..

 

2 comments other